Pou premye match yo nan kad eliminatwa Mondyal 2026 la, Grenadye yo rive bat Sainte-Lucie 2 a 1. Aprè match lan, Fafa Picault te fè ti pale devan mikwo FHF. Atakan Colorado Springs lan kontan rezilta a, men li abòde dyèl k ap vini an fas Barbade, yon match ki p ap fasil selon nimewo 7 seleksyon nasyonal la.
Fafa Picault pami jwè ki te reyalize pi bon pèfòmans sou teren an, nan match ki te opoze Haïti ak Sainte-Lucie a. Malgre advèsè yo te fè yon bèl rezistans, Grenadye yo te rive genyen match la 2 a 1. Aprè kout silfè final la, jwè Colorado Springs lan te bay enpresyon l sou rezilta a : “Nan kòmansman an, li pa t fasil paske yo te jwe trè ba, men nan dezyèm mitan an match la te ouvè plis. Boutonfen, nou jwenn opòtinite pou nou fè plis gòl”.
Nimewo 7 seleksyon nasyonal la te tou pwofite abòde dezyèm match ekip la ap gen pou l jwe nan eliminatwa yo : “Nou konnen nou gen yon lòt match difisil k ap tann nou dimanch, men enpòtan an sèke nou jwenn twa pwen an jodia epi nou rete pozitif. Nou gen menm gwoup la, nou ini, epi n ap prepare n pou match dimanch lan”.
Menm si li admèt match fas Barbade la ap difisil, Fafa Picault kwè nan fòs ekip la. Dimanch k ap vini an, se ap okazyon pou jwè Sébastien Migné yo vin gen sis pwen si yo bat, epi pran tèt poul la. Sa k ap mete yo nan pi bon kondisyon pou yo kalifye pou dezyèm faz la.